Bli med på trusopplæringsdugnad!

Å hjelpe eit barn å bli kjend med Jesus og den kristne trua er ei stor oppgåve!

Då er det godt å vite at vi er fleire som deler på ansvaret.

Gjennom trusopplæringsreforma (2010) fekk kyrkja ansvar for å formidle den kristne trua til alle døypte barn. Tidlegare var dette ein del av den obligatoriske kristendomsundervisninga i skulen. No er opplæringa frivilleg,– men ikkje mindre viktig av den grunn! 

Kyrkja har gjennom tilsette ansvar for trusopplæringa,– saman med deg som forelder/førsett eller fadder. Vi veit at trusopplæringa barnet får i heimen er aller, aller viktigast! Difor gir vi deg 4 konkrete oppfordringar:

1. Les barnebibel og bøker med bibelforteljingar for barnet! 
Vi kristne er heldige! Vår Gud har for ein stor del gitt oss sin bodskap gjennom forteljingar, og barn har ei unik evne til å «gå inn i» og forstå forteljingar. 

2. Be kveldsbøn og bordbøn!  
Faste vaner, ritual og rammer gir tryggleik. Å synge eller be bordbøn set ei tydeleg ramme rundt måltidet, og det gjer godt både for liten og stor å legge dagen som er over og den komande natta i Guds hender når ein ber kveldsbøn. 

3. Delta på trusopplæringstiltaka!
Dette er kyrkja sitt største og viktigaste bidrag til trusopplæringsdugnaden; samlingar som formidlar kristen tru og tradisjon gjennom fellesskap, leik og formidling som er skreddarsydd for målgruppa. 

4. Delta på kontinuerlege tiltak
Babysong, søndagsskule, barnegospel, Soul Children, barneforeining med meir i regi av kyrkja og andre organisasjonar. 

Aktivitetar for barn og unge i kyrkja vår 

	0–1 år: Babysong i partalsvekene fram til 16. desember. Ny plan kjem rett før nyttår. Følg sida: "Babysong i Gloppen" på Facebook.
	1–4 år: Småbarnstreff i Sandane kyrkje ca en gong i måneden. Følg sida: "Småbarnstreff i Sandane kyrkje" på Facebook.
	4 år: Laurdagssamling med song, leik, bibelforteljing og laurdagsgraut. Familiegudsteneste med utdeling av 4–årsbok i Breim og Sandane kyrkje. Barna får invitasjon i posten.
	6 år: Familiegudsteneste i Breim og Sandane kyrkje med påskevandring og utdeling av bok til 6–åringar. Barna får invitasjon i posten.
	9 år (4.klasse): Tårnagenthelg Tårnagentsamling laurdag der agentane utforskar kyrkja, Bibelen, tårnet og klokkene. Dei løyser oppdrag og mysterium og får agentbevis. På søndagen vil alle som kjem til kyrkja få vite kva agentane har funne ut. Barna får invitasjon i posten.
	11 år  (6.klasse): Lys Vaken. Lærerikt fellesskap med leik, god mat, overnatting i kyrkja, og gudsteneste med Lys vaken–preg i Breim kyrkje og Vereide kyrkje. Invitasjon kjem i posten.
	13 år (7.klasse): Narnia–filmkveld og aktivitetsløype for alle 7.–klassingar i heile Gloppen. Stad: Gloppen ungdomsskule. Invitasjon kjem i posten.
	15 år ( 9.klasse): Konfirmantåret med undervisning, aktivitetsgrupper, konfirmantleir.
	15–16 år: MILK–kurs. (MiniLeiarKurs). 5 samlingar for deg som vil lære meir om Gud, deg sjølv og det å vere leiar. Leiarpraksis på konf–leir, natt–cup og andre trusopplæringsaktivitetar.