Alle nettsider krever nå en tilgjengelighetserklæring. Denne kan du lese ved å klikke på linken under
Les tilgjengelighetserklæringenNyheter
Revidert plan for diakoni i Den norske kyrkja
Hausten 2020 vart Plan for diakoni for Den norske kyrkja revidert. Denne planen gjev ei forståing av diakoni og ei retning for det diakonale arbeidet.
Revideringa av den førre planen frå 2007 er gjort på bakgrunn av endringar i samfunnet og i diakonale utfordringar. Men ein god del er også til å kjenne igjen frå førre plan. Visjonen er framleis «Guds kjærleik til alle menneske, verkeleggjort gjennom liv og teneste». Definisjonen er også uendra: «Diakoni er kyrkja si omsorgsteneste. Den er evangeliet i handling og blir uttrykt gjennom nestekjærleik, inkluderande fellesskap, vern om skaparverket og kampen for rettferd.»
Innan dette spekteret ligg det mykje vi som kyrkje både kan gjere og vere for å gje Guds kjærleik til medmenneska og for å forvalte skaparverket. Den nye planen er lettlesen og kan anbefalast å kikke på: Plan for diakoni i Den norske kyrkja.
Planen får poengtert at diakoni er ein del av kyrkja sitt vesen, og diakoni er noko mange er delaktige i, kanskje utan å vere så bevisste på det. Planen gjev også jordnære utfordringar til oss alle.
Lokale planar
Ut ifrå hovudområda i den nasjonale planen for diakoni, lagar ein lokale planar for kvart sokn. I Gloppen har det lenge vore tradisjon for godt arbeid med diakoniplanar. Planane har involvert både stab, sokneråda, diakoninemndene og mange frivillige, og tiltaka er retta mot alle aldersgrupper.
I Breim sokn laga soknerådet med Venke Kollbotn i spissen ein ny diakoniplan våren 2019. I Hyen er gjeldande plan for perioden 2016-2020. Her er eit revideringsarbeid i gang for ny periode.
I Gloppen sokn har soknerådet nyleg vedteke diakoniplan for 2020-2024. Dei tidlegare sokna Gimmestad og Vereide hadde kvar sine planar. Mykje av det som var nemnt i desse planane har vore og er framleis oppegåande. Men no er revideringa av dei gamle planane unnagjort i samarbeid mellom diakon, diakoninemnd, diakonikontakter i soknerådet og innspel frå andre i staben, før den nye planen var oppe i soknerådet.
Dei lokale planane er både arbeidsreiskapar og ei synleggjering av det vi driv med. Det er ikkje alt vi har fått gjort i år grunna smitte-restriksjonane, men vi håpar på meir normale tilstandar framover.
Bli med!
Det er alltid plass til fleire i det frivillige arbeidet i kyrkja. Ta gjerne ein kikk på planane som er lagt ut under. Kanskje det er fleire som har lyst til å engasjere seg i til dømes besøksteneste, samlingar for eldre, oppgåver for frivillige under gudstenester eller tiltak i trusopplæringa? Ta gjerne kontakt! Alle kan vere «kvardags-diakonar» der ein er, og så kan det også vere flott å få stå saman med andre i diakoniteneste.
Diakoniplan for Breim sokn
Diakoniplan for Hyen sokn
Sjå også Dugnadskort i Gloppen sokn
Kontaktinfo:
ingebjorg.fure@gloppen.kyrkja.no
Tlf: 966 18 048
Kontaktinfo sokneråda (lenke)
Illustrasjon. Foto: Michal Jarmoluk fra Pixabay.
Publisert av: Ingebjørg Isane Fure den 17-12-2020 |